![](https://omulunga.com.na/wp-content/uploads/2024/06/police.jpg)
Opolisi yoshilongo moshitopolwa oya patululile oshipotha shedhipago omukiintu omu Namibia gomimvo 48 sho kwa lopotwa a dhenge noku dhipaga omukiintu gomimvo 43 omukwashigwana gwa Angola.
Omukwatakanithi gwekondololo lyiimbuluma moshitopolwa Dep Comm Titus Ekandjo okwati oshiningwanima osha holoka metiyali lopotundi onti 10h00 yuusiku komukunda Ohaiyanda moshikandjohogololo Eengodi.
Nakusa okwa tumbulwa oye Anna Pedro okuza momukunda Ohaiyanda nomufekelwa okwa tulilwamo oshipotha shedhipago.
Okwa hokololwa kutya olugodhi olwa tukuka pokati kaakiintu yaali,omolwa omulumentu,sho omukiintu ngoka eli nakusa,ayi kegumbo lyomufekelwa,moka ,omukiintu ngoka eli nakusa aadha omulumentu gwe a lala nomufekelwa.
Pedro nomufekelwa taa tameke taa kondjo,nomulumentu okweya hangukununa.
Pedro ta shuna kegumbo lyaandjawo,ashike omufekelwa okwemu landula,noku tameka temu dhenge natango.
Omulumentu teya hangukununa natango.
Omukiintu,eli nakusa ngaashingeyi tayi kegumbo,ashike okwiihatapo oshinano oshishona okuza mpoka kwali taya kondjele noku hulitha.
Omufekelwa okwa tegelelwa a holoke mohofa ya Tsumeb ongula.
Nomakonakono gopolisi otaga tsikile.