Ovatoti veta moshilongo Uganda okwa lopotwa vakupulashi omafaneko okupitika ounona voukadona vena omido 15 vapewe oufemba woingabekifo yomaludalo opo shiye moshipala omafimbapalo mokati kounona.
Eshi osha landula eshi ovanambelewa vopombada moshikondo shouhaku moshilongo osho vali vapula opo omashundulo nomalengaifo haaningilwa ounona voukandona ovo tava longifa oingabekifo yomaludalo akale amonenwa exulilo moshilongo.
Omapekaapeko oo aningwa mo UGANDA okwa ulika kutya, etata lounona voukadona veli pokati komido 15- 19 ovafimbapala omanga vamwe vena nale ounona.
Onghalo yefimbapalo moshilongo osho oya didilikwa yaya pombada pefimbo letukuko lombuto yo Covid-19, eshi eefikola dakala dapatwa oule womido dili hanga pu 2.
Ovanaveta ovayandja elombwelo opo ounona voukadona velikaleke kokule nokuya moixulo.