Ongundu yo SWAPO otayi ka ninga omunyanyo nokuya koombelewa dhiigwana ya hangana ongula,okugandja omukandanyanyeto omolwa omadhipago gaa Palestine kaakwiita ya Israel.
Amushanga gomauyelele mongundu Hilma Nikanor ohela okwa tseyitha kutya omunyanyo gwa thanekwa oguukumwe noku yambidhidha aa Palestine.
Tati omunyanyo otagu tamekele ko Zoo Park mondoolopa ethimbo lyongula,nokuya koombonge dho UN ko Klein Windhoek.
Tati iilyo ayihe yo SWAPO,aayambidhidhi naaholimbili ayehe otaya indilwa ya wayimine omunyanyo.
Ta gwedhako kutya omunyanyo ogwa mangulukila aa Namibia ayehe inaashi tala kuukwatya wawo wopapolitika,nenge wopambepo.
Nikanor tati Namibia ota vulu okweeta elunduluko pakwiithana iilyolongo yilwe yi konge ekandulepo lyuupyakadhi, okupitila pamukalo gombili.