Euveko lyuulema woshipa

EUVEKO LYUULEMA WOSHIPA 

Uulema woshipa,hashiithanwa albinism melaka lyoshitakumi ,owo uulema mboka hau vulu okutakamithwa.

Netakamitho ewanawa lyoshipa nomeho, oshowo omalyenge yambidhidho,aantu yena uulema woshipa otaya vulu okwaadha omapondolo moonkamwenyo dhawo.

Uulema woshipa ohau holoka uuna omuntu a valwa ena oshipa shaahena o melanin,ndjoka hayi gandja olwaala koshipa ,komafufu nokomeho.

Nuulema mbuka ohau thigululwa okuza kaakuluntu.

Aantu yena uulema woshipa miipotha oyindji  oya taalela omashongo okuza moshigwana.

Okuza koku ithanwa omadhina nenge iitya tayi shundula ngaashi oo Nambalakats,omakishi,oondjima,oondoongi,nosho tuu.

Omanga aanona ya valwa yena uulema woshipa haya ipatanwa koohe,ya taalela omangwandjagulo mooskola nomoshigwana,noku tindilwa omayakulo moompito dhimwe.

Kiilongo ngaashi ko Tanzania,Malawi nomo Nigeria ,ohaku holoka iipotha oyindji yaantu yena uulema woshipa taya hahalwa,niilyo yolutu yawo tayi tetwako  noku landithwapo omolwa omaitaalo ga yooloka,mwa kwatelwa uumpulile ,nenge okwiiyambapaleka,molwaashoka opena omitotolombo kutya iilyo yolutu yawo oyina elago nenge tayi eta uuyamba.

Ashike mo Namibia iipotha yafa mpoka ngele ohayi lopotelwamo iishona lela, nenge ihaayi lopotwa.

Ashike oshiningwanima shi kumitha osha lopotwa mu 18 February 2022,sho omuntu ena uulema woshipa aadhika kaafekelwa mboka ya hala okulanda omafufu ge gokomutse.

Opolisi nehangano linasha naantu yena uulema woshipa oyiidhomo moshinima shoka,naafekelwa oya mangwapo,taya holoka mohofa mo WHK,nonkee yeli mondjedhililo.

Mu Sept 2021,ombelewa yo Ombudsman oyuunganekele oshigongiilonga shinasha neuveko lyuulema woshipa,nokwali sha kaliwa kiikundaneki,aakalelipo yomahangano gaanulema woshipa,naantu mboka yena uulema woshipa.

Meme Shirley Gunn,eli omushangi nomudhindi gokambo Euvakeo lyuulema woshipa ,nokuli wo omupekapeki ko Human Rights Media Centre ko South Africa, oye kwali a kwatele komeho oshigongiilonga.

Oshigongiilonga okwali sha lalakanene okweeta pamwe aantu yena uulema woshipa ,opo yiikunde omashongo ngoka ya taalela,nokwiikunda omikalo dhoku konga eyambidhidho kepangelo.

Natango oshigongiilonga osha dhenge omuthindo koku lopota komondjila okuza kombinga yiikundaneki,molwaashoka aantu yena uulema woshipa otaya nyenyeta kutya ohaya lopotwa miikundaneki onga aantu taya lumbu nuulema woshipa,ashike yo aantu yena uulema woshipa nenge aantu yena uulema.

Onzonkundana yo Future media news oyayi moonkundathana nomukwateli komeho gwehangano lyaantu yena uulema woshipa o Namibia Albino Association, Tate Joseph Ndinomupya,ngoka naye ena uulema woshipa,

Joseph tati  ehangano lyawo olina iilyo ya thika 3000, nomwaalu otagu ende tagu koko.

Ehangano lyawo ohali gandja omayakulo ngaashi okugandja omagala nomagadhi gomutenya kiilyo,noku gandja uuyelele wunasha nokutumina aantu mboka yena uulema woshipa koondohotola dhoshipa,noku gandja wo enongelo netsomukumo kaantu yena uulema woshipa.

Ndinomupya ta gwedhako kutya otaya pandula epangelo omolwa omayakulo ngoka haya mono,ngaashi oshimaliwa shopenzela,shoka hashi pewa aanona oshowo aakuluntu.

Ndinomupya tiindiile wo oshigwana opo shi ya taambeko onga aantu yafa ashike aantu ooyakwawo,molwaashoka omathimbo gamwe ohaya tindilwa omayakulo ngoka taya kongo.

Omupresitend gwehangano lyaantu yena uulema ta kunkilile wo aantu yena uulema woshipa opo ya konge omakwatho gankene yena okwiitakamitha nenge okumona uuyelele oundji, paku kwatathana naye ko 081 1 45657 nenge nomupevi presitend gwehangano Tate Walde Kambabi ngoka eli koshitopolwa sha Ohangwena ,ko 081 29 20487.